Dictionary of Old English

Dictionary of Old English Corpus
in Electronic Form

November 2004

Short Title: PPs (prose)
Short Short Title: PPs (prose)

November 2004

760 citations

Dictionary of Old English
130 St. George St. Rm. 14285
University of Toronto
Toronto, Ontario
M5S 3H1
CANADA

Cameron number: B8.2.1

We ask that you not copy and/or (re)distribute the corpus without the written consent of the Dictionary of Old English. The individual scholar must take responsibility for clearing copyright with the editors and publishers of the editions used in his/her own citations of the material.

Psalms 1-50: Bright and Ramsay 1907, 1-122; Bright and Ramsay 1907, Liber Psalmorum: The West-Saxon Psalms, Being the Prose Portion, or the 'First Fifty' of the So-Called Paris Psalter (Boston).

Cited by psalm and verse no. following ed.

Text category: Prose

Psalm 30 (= Ps 31 NIV)

(the verse divisions seems different here; it looks like your 31:14 starts here at 30:17)

[039000 (30.1)] To þe ic hopige, Drihten, ne gesceamað me næfre þæs; on þinre rihtwisnesse alys me, and gefriða me.

[039100 (30.2)] Onhyld to me þine earan, and efste þæt þu me gefriðie.

[039200 (30.3)] And beo min God, and min gefriðiend, and beo min friðstow, and gedo me halne.

[039300 (30.4)] For þam þu eart min trymnes and min gebeorh, and on þinum naman ic þe healsige, þæt þu beo min ladþeow, and me fede.

[039400 (30.5)] And alæd me of þysum grynum, þe her gehydde synt beforan me, for þam þu eart min gescyldend, Drihten, <on> þine handa ic befæste mine sawle.

[039500 (30.6)] þu me ahreddest, Drihten, rihtwisnesse God; þu hatodest þa þe beeodon idelnesse, and eac þa þe unnyt worhton.

[039600 (30.7)] Ic þonne symle hopige to Drihtne, and fægnie, and wynsumige, and blissige on þinre mildheortnesse.

[039700 (30.8)] For þam þu gesawe mine eadmodnesse, and þu gedydest hale æt nydþearfe mine sawle, and me ne <demdest> on minra feonda handa.

[039800 (30.9)] Ac asettest mine fet on swyðe brad land: gemiltsa me nu, Drihten, for þam ic swince.

[039900 (30.10)] Mine eagan wæron gedrefede and afærde, for þinum yrre; and eac swa ilce, min mod and min maga.

[040000 (30.11)] For þam full neah on þam sare geteorode and geendode min lif, and min gear wæron on sicetunga, and on gestæne.

[040100 (30.12)] And geuntrumod wæs for wædle, and for yrmðum, min mægen; and min ban wæron gedrefedu, and fullneah forod.

[040200 (30.13)] Ofer ealle mine fynd ic eom geworden to edwite, and minum neahgeburum swiðost; ic eom worden him to ege, and eallum þam þe me cunnon.

[040300 (30.14)] þa þe me gesawon, hi me flugon: ful neah ic afeoll, swa swa se þe byð dead on his heortan, and on his mode; and ic wæs swylce forloren fæt, and tobrocen.

[040400 (30.15)] For þam ic gehyrde manegra manna edwit, þe me ymbutan budon.

[040500 (30.16)] And swa hwær swa hi hi gegaderodon ealle togædere, to þam þæt hy þeahtodon, hu hi mihton geniman mine sawle.

[040600 (30.17)] And ic þeah, Drihten, to þe hopode, and sæde þæt þu wære min God: on þinum handum synd þa lenga minra tida.

[040700 (30.18)] Alys me, and gefriða me of minra feonda handum, and fram þam þe min ehtað.

[040800 (30.19)] And onliht þinne andwlitan ofer þinne þeow, and gedo me halne for þinre mildheortnesse, and gedo þæt me ne gesceamige, for þam ic cleopode to þe.

[040900 (30.20)] Ac þeah sceal gescamian þa unrihtwisan, and hi beoð gelæd to helle; and adumbiað þa facnfullan weoloras, þa þe sprecað wið þone rihtwisan unriht, on heora ofermettum, and on heora <leahtrunga>.

[041000 (30.21)] Eala, Drihten, hu micel and hu manigfeald is seo mycelnes þinre swetnesse, þe þu hæfst gehyd and gehealden þam þe þe ondrædað: þa swetnesse þu him ne lætst næfre aspringan, nanum þæra þe to þe hopað beforan manna bearnum.

[041100 (30.22)] þu <hi> gehydst and gehyldst hale and orsorge, ægðer ge modes ge lichaman, butan ælcere gedrefednesse, þe menn þrowiað.

[041200 (30.23)] þu hi gescyldst on þinum temple, wið ælcere tungan leahtrunge.

[041300 (30.24)] Gebletsod sy Drihten; for þam he swa wuldorlice gecydde his mildheortnesse me, on þære fæstan byrig.

[041400 (30.25)] Ic cwæð on minre fyrhto, þæt ic wære aworpen of þinra eagena ansyne.

[041500 (30.26)] And þu þa for þi gehyrdest þa stemne minra gebeda, þa ic to þe cliopode.

[041600 (30.27)] Lufiað nu for þan Drihten ealle his halgan; for þam rihtwisnesse God <lufað> and secð, and forgylt be fullan ælcum þe ofermetto doð.

[041700 (30.28)] Ac doð esnlice, and gestrangiað eowere heortan, and eower mod, ælc þæra þe to Gode hopige.